Koj tab tom mloog kev thov Vajtswv txhua hnub saum xov tooj cua Oneway Radio los ntawm tej zaj kawm hauv Vajtswv Txojlus dhau ntawm ntau tus lub neej uas lawv tau ntsib dhau txhua hnub, muab tawm ntawm CBN Devotional Daily. Xav kom koj tau lub neej tshiab txhua hnub hauv koj lub neej caum tus Tswv qab
Nyob rau hauv ib txoj kev npaj hu nkauj, muaj ib zaj nkauj muaj lub npe tias “Ua neej pub rau Tswv Yexus” tau hu tawm hauv ib lub tsev kaw nkauj. Xav tias ntshe tsuas yog ib zaj nkauj txhua tus yeej ib txwm paub, tiamsis thaum Vajtswv txojlus tau hais tawm, tau muaj coob tug lub neej tau hloov, thiab tseem tshwj xeeb tshaj yog thaum uas cov ntsiab lus ntawd tau nthuav dav mus rau txhua qhov, ua rau coob tug lub neej tig los cuag Tswv Yexus.
Hnub no, yog hnub 23/11/2021, Kev thov Vajtswv txhua hnub thov caw sawv daws nrog kawm Vajtswv Txojlus ua ke nrog tus qhia Craig von Buseck dhau ntawm zaj kawm UA NEEJ PUB RAU TSWV YEXUS
Tej lus uas Kuv hais tawm lawm zoo ib yam li ntawd ntag; tej lus ntawd yuav tsis rov qab los cuag Kuv dawb do ib zaug li, tiamsis yuav tawg paj txi txiv raws li Kuv xav tseg lawm, Kuv tej lus yuav ua txhua yam uas Kuv tso nws mus ua. (Yaxayas 55:11)
Tsis ntev los no peb kaw ib cov nkauj tshiab thiab cov neeg ua nkauj yuam kom peb kaw Video txog qee lub suab nkauj ntawm peb txoj kev npaj ua. Ib zaj nyob rau hauv cov nkauj ntawd yog “Live For Jesus” (Txhais tias yog “Ua neej pub rau Tswv Yexus”) thiab kuv tus niam hluas yog tus hu nws hu tau zoo kawg. Nqe tshooj ntawm zaj nkauj ntawd hu li no:
Kuv xav ua neej pub rau Tswv Yexus
Tag nrho kuv lub neej ua pub rau Nws
Kuv xav nthuav qhia Vajtswv txoj kev hlub
Kom neeg ntiajteb paub txog Nws txoj kev hlub.
Hnub ntawd nyob rau hauv lub chav kaw nkauj, peb xav coj kom txhua tus tig mus cuag ntawm Tswv Yexus thaum uas tij laug Al yog tus uas yuav luam cov nkauj tawm tau nug peb. Peb tau tham tias peb tau saj Vajtswv txoj kev hlub zoo npaum li cas thiab muaj txoj kev sib raug zoo nrog Tswv Yexus Khetos tsis yog ib txoj kev ntseeg qhuav qhawv lam ua kom tas kev cai.
Hnub tom qab, Al ib ke taug kev ib ke hu nqe tshooj ntawm zaj nkauj ntawd. Al tsuas nco cov suab taub xwb, nws yeej tsis nco cov ntsiab lus li. Yawg mus rau hauv tsev rho nyiaj thiab nres tos. Lub suab nkauj ntawd pheej nrov mus nrov los hauv yawg lub taubhau. “Ntawm no yog zaj nkauj dab tsi ne?” Yawg cim civ nug. Al ua tas nws tes haujlwm thiab tawm mus rau nraum zoov. Thaum kawg cov ntsiab lus ntawm zaj nkauj ntawd tau nco rau hauv Al lub taub hau thaum twg tsis paub thiab nws pib hu tawm suab:
Kuv xav ua neej pub rau Tswv Yexus
Tag nrho kuv lub neej ua pub rau Nws
Kuv xav nthuav qhia Vajtswv txoj kev hlub
Kom neeg ntiajteb paub txog Nws txoj kev hlub.
Xwb tim ntawd yawg cia li tsim dheev. Thaum uas mloog tej lus uas nws lub qhov ncauj tau hu tawm, ua rau yawg lub hlwb xav tsis tawm. “Kuv tab tom hu dab tsi?” Nws hais nrov nrov. Txhua tus neeg mus dhau puav leej saib ntsoov rau yawg. Nrog ib lub suab luag tsis txaus siab, Al siv zog muab zaj nkauj ntawd tshem tawm hauv yawg lub taub hau mus los ntawm qhov uas xav txog lwm zaj nkauj uas tab tom muaj koob nrov npe thaum no.
Al rov qab los rau ntawm tsev ua haujlwm thiab siv zog muab zaj nkauj ntawd rho tawm. Yawg mloog xov tooj thiab pib muab tej nkauj tso ua ntu zus ntawm tej tsev hu nkauj hauv zej zos txog rau tej kev yuav mus hu tawm sab nraud. Tiamsis yawg yeej tsis hnov qab peb pab hu nkauj thiab txoj nkauj ntawd li.
Ob peb hli tom qab, yawg pib npaj ib lub rooj sib twv hu nkauj tseg rau tej pab pawg hu nkauj nyob rau hauv zej zos. Thiab koj sim xav seb zaj nkauj twg hauv peb pab tau xaiv?
Thaum lub tsev ua haujlwm yuam kom yuav tau xa qee zaj nkauj xa mus rau tebchaws Liên Xô qub zoo li ib feem ntawm kev sib pauv txog kev coj noj coj ua, sim xav seb Al tau xaiv cov video twg? Tomqab ntawd, yawg hais rau peb tias nej cov video ntseeg Vajtswv tau muab coj los qhib rau saum fuab cua Liên Xô tej xov xwm tau ntau hli.
Ib xyoo dhau mus lawm muaj ib hnub kuv cia li ntsib Al ntawm tsev muag khoom. Yawg yeej tseem hnav lub tsho tes ntev thiab ntoo lub mom ib ntev li qub. Tiamsis nws tus cwjpwm hloov pauv lawm ntau dua li zaum kawg uas peb tau sib tham ua ke.
“Kuv yeej tseem ua nkauj” – Yawg hais, “Thiab kuv twb mus hauv tuamtsev tau ntau hli lawm.”
Thoob plaws kuv lub neej. Vajtswv tau ua rau kuv pom los ntawm ntau txoj kev tias Vajtswv txojlus muaj hwjchim kawg. “Rau qhov Vajtswv tus uas muaj sia nyob, Nws tej lus tseem ceeb thiab muaj kuab kawg li. Tej lus ntawd ntse dua rab ntaj ob sab ntse, nkaug mus txog nruab plab nruab plawv nruab nqaij nruab txha. Tej lus ntawd paub tej uas neeg xav thiab paub neeg lub siab huv tib si.” (Henplais 4:12).
Peb muaj Vajtswv tej lus cog tseg zoo kawg nkaus txog kev tshaj tawm Vajtswv txoj moo zoo nyob hauv Yaxayas 55:11: “Tej lus uas Kuv hais tawm lawm zoo ib yam li ntawd ntag; tej lus ntawd yuav tsis rov qab los cuag Kuv dawb do ib zaug li, tiamsis yuav tawg paj txi txiv raws li Kuv xav tseg lawm, Kuv tej lus yuav ua txhua yam uas Kuv tso nws mus ua.”
Peb tes haujlwm tsis yog tias mus nrog lwm tus sib cav lossis siv zog ua pov thawj tias yus thiaj yog hos lwm tus ces yuam kev. Peb tsuas yog cov neeg xa xov, muab txojmoo zoo nthuav qhia rau cov tib neeg uas tab tom raug kaw hauv lawv txoj kev txhaum. Vaj Ntsujplig yuav yog tus uas ua rau kom Vajtswv txojlus muaj hwjchim, caw lwm tus los mus cuag Tswv Yexus.
Zoo ib yam li tus neeg ua liaj ua teb lawv tsuas muab lub noob coj mus tso rau hauv av xwb, peb tsuas qhia tau tej uas peb twb tau lwm tus qhia peb lawm. Vajtswv yog tus ua rau kom nag poob los, pub tshav ntuj thiab tej kua tshuaj hauv av kom lub noob tawg kaus, thiab muaj dua ib txoj sia tshiab.
Koj puas tau siv tej caijnyoog zoo uas Vajtswv pub rau koj kom tseb tej noob uas yog Vajtswv txojlus lawm tau? Koj puas siv koj lub peev xwm kom ntsia pom Vajtswv lub tebchaws nyob hauv ntiajteb no?
Koj puas tab tom ua neej pub rau Tswv Yexus?
Raws li tej uas kuv paub txog Al thiab nws tsev neeg yeej mus koom rau tej pawg ntseeg hauv zej zos. Tej zaug yuav muaj ib tug Al twg ntawd nyob rau hauv koj lub neej, tab tom tos mloog ib zaj nkauj zoo. Koj puas mloog Vajtswv lus thiab hu zaj nkauj ntawd – los yog nthuav qhia tawm? Tsis paub tsam ho zoo li kuv, tus neeg uas koj tab tom nthuav qhia ntawd yuav xa cov ntsiab lus ntawd mus rau thoob plaws ntiajteb kom lawv tau hnov!
Thov caw nrog kuv peb thov Vajtswv ua ke: Tswv Yexus, kuv xav ua neej pub rau Koj. Thov pub rau kom kuv muaj lub siab tawv thiab qhia rau kom kuv pom tej lub sijhawm zoo kom kuv yuav hu tau nkauj thiab hais Koj qhia rau tej neeg nyob ib ncig kuv. Kuv thov hauv Tswv Yexus Khetos lub npe. Amees.
Cov kwv tij peb tsis paub tias leej twg yuav yog tus txais yuav leej twg yuav yog tus tsis txais txoj moo zoo uas peb qhia, tiamsis kav tsi ua siab tawv khov kho, siv txhua lub sijhawm koj muaj, cov tib neeg uas Vajtswv tau coj los rau hauv peb lub neej, pab kom lawv paub txog Vajtswv lub homphiaj thiab Nws txoj kev hlub tau muab pub rau lawv. Puas muaj lub npe twg tshwm sim nyob rau hauv koj lub taub hau tamsim no? Yog muaj, kav tsij npaj kom txhij. Yog tsis tau muaj, kav tsij siv zog thov Vajtswv.
Nyob zoo sawv daws, thov foom kom ib hnub tshiab tau txais koob hmoov zoo thiab mam sib ntsib rau taig kis!
Cov kwv tij, yog koj xav paub ntxiv txog Tswv Yexus lossis koj muaj tej kev khwv twg, kev khuab xeeb twg xav hais qhia rau peb paub, thov nej sau ntawd cia nyob rau tom qab zaj kawm, inbox ntawm fanpage hauv Facebook, lossis xa ntawd email rau hauv thaj chaw:[email protected]. Tswv Yexus hlub koj.Thiab peb xav kom txuas tau nrog koj.